Вработените во АД ЕСМ, Подружница ХЕС Маврово деновиве почнаа акција за партерно уредување на просторот околу споменикот на градителите на мавровските хидроелектрани, лоциран на регионалниот пат Маврови Анови – Дебар. Активностите предвидуваат целосно уредување и чистење околу споменикот од висока трева и ситен отпад, обнова на клупите, замена на дотраените плочки и хортикултурно уредување околу платото на споменикот.

ЗА АД ЕСМ како општествено одговорна компанија, ова е едно од најзначајните спомен обележја кое е подигнато во чест на загинатите градители, што трагично ги загубиле животите во снежна лавина , ноќта помеѓу 11 и 12 февруари, 1956 година, градејќи го хидроенергетскиот систем „Маврово“. Делегации на АД ЕСМ и на Подружница ХЕС Маврово, секоја година на 11 февруари положуваат цвеќе пред споменикот, а во чест на работниците, се одржува и познатиот спортски настан во нордиско скијање „Мавровски меморијал“.